中Xitoy va Oʻzbekiston ·
Toshkent va Xitoy investitsiya loyihalarini muhokama qildi
Toshkent shahar hokimligida Xitoyning Guandun provinsiyasi va Shenchjen shahri vakillari bilan investitsiya hamda savdo-iqtisodiy hamkorlikni kengaytirish masalalari muhokama qilindi.
Uchrashuvda Chju Tun boshchiligidagi Xitoy delegatsiyasi va Toshkent shahar hokimining Xitoy bilan hamkorlik masalalari boʻyicha maslahatchisi Eldor Xolmatov hamda shahar idoralari vakillari ishtirok etdi. Tomonlar turizm infratuzilmasi va HoReCa, yaʼni mehmonxona hamda restoran biznesi sohasini rivojlantirish imkoniyatlarini koʻrib chiqdilar.
Muzokaralar davomida mehmonxona va restoranlar uchun professional oshxonalarni loyihalash, uglerod chiqindisi kam boʻlgan zamonaviy uskunalar hamda chiqindisiz texnologiyalarni joriy etish masalalariga alohida eʼtibor qaratildi. Shuningdek, sanoat sovutish moslamalari va non yopish liniyalarini qoʻllash hamda aqlli sanoat parklarini tashkil etish boʻyicha tajriba almashish koʻrib chiqildi.
Muloqot yakunida tomonlar Toshkent hamda Guandun va Shenchjen yetakchi ishlab chiqaruvchilari oʻrtasidagi amaliy aloqalarni mustahkamlashga va qoʻshma investitsiya loyihalarini amalga oshirishga tayyor ekanliklarini bildirishdi.
Manba: UzDaily.uz · 5-noyabr