贸Savdo va kargo ·
Tsindaoda Fargʻona-Xitoy savdo markazi ochildi
Xitoyning Tsindao shahrida Fargʻona–Xitoy savdo va investitsiya markazi ochildi. U viloyat mahsulotlarini Xitoy bozoriga olib chiqishga yordam beradi.
Xitoyning Tsindao shahrida Fargʻona–Xitoy savdo va investitsiya markazi oʻz ishini boshladi. Markaz «Xitoy – SHXT» mahalliy savdo-iqtisodiy hamkorlik koʻrgazma zonasi hududida joylashgan. Ushbu maskan Fargʻona viloyati mahsulotlarini Xitoy bozoriga olib chiqish va qoʻshma loyihalarni qoʻllab-quvvatlashga xizmat qiladi.
Ushbu markazning ochilishi Fargʻona viloyati delegatsiyasining Shandung provinsiyasiga qilgan tashrifi doirasida amalga oshirildi. Oʻzbekiston vakillari Tsindao va Szinan shaharlarida uchrashuvlar oʻtkazib, telekommunikatsiya, sanoat uskunalari, yoʻllar hamda koʻpriklar qurilishi kabi yoʻnalishlarda hamkorlik imkoniyatlarini muhokama qilishdi.
Tashrif davomida Fargʻona viloyati hamda Bagʻdod tumani hokimliklari Xitoy tashkilotlari va kompaniyalari bilan hamkorlik memorandumlarini imzoladi. Shuningdek, delegatsiya aʼzolari chorvachilik, sutni qayta ishlash, veterinariya vositalarini ishlab chiqarish va issiqxonalar uchun moʻljallangan bioparchalanuvchi plyonkalar tayyorlash tajribasi bilan tanishdilar.
Manba: UzDaily.uz · 7-noyabr