贸Savdo va kargo ·
Oʻzbekiston tarvuzlari Xitoy bozoriga eksport qilinadi
Oʻzbekistonda yetishtirilgan tarvuzlarni Xitoyga eksport qilish uchun fitosanitariya ruxsati olindi. Mahalliy mahsulotlar qatʼiy standartlar asosida Xitoyga yetkazib beriladi.
Oʻzbekiston tarvuzlarini Xitoyga yuborish Oziq-ovqat mahsulotlari xavfsizligi qoʻmitasi roʻyxatidan oʻtgan hamda Xitoy tomoni tasdiqlagan dalalar va qadoqlash sexlaridan amalga oshiriladi. Ushbu dalalarda doimiy fitosanitariya monitoringi olib borilib, mahsulotlar qovun pashshasi kabi zararkunandalardan xoli boʻlishi talab etiladi.
Eksport qilinadigan har bir qadoqda mahsulot nomi, kelib chiqish joyi, dala va qadoqlash sexining kodi xitoy yoki ingliz tilida koʻrsatiladi. Har bir yuk fitosanitariya sertifikati bilan rasmiylashtiriladi. Agar belgilangan talablar buzilsa, ushbu korxonadan eksport qilish butun mavsumga toʻxtatilishi mumkin.
Xitoy Bosh bojxona maʼmuriyati maʼlumotlariga koʻra, 2024-yilda mamlakatga xorijdan 47,8 million dollarlik 296 ming tonnaga yaqin tarvuz import qilingan. U yerga tarvuz yetkazib bergan asosiy davlatlar Myanma va Vyetnam boʻlgan. 2025-yilda Oʻzbekistondan jami 233 ming tonnadan ziyod poliz mahsulotlari eksport qilingan.
Manba: UzA · 24-oktabr